Kalurahan Kalitekuk

Desa Kalitekuk; Saperangan taksih kathah para tiyang ingkang taksih kirang leres anggenipun ngginakaken basa jawa ingkang leres lan sae mungguhing trap trapan ingkang sak mesthinipun. Kawontenan ingkang kados mekaten sakestu dadosaken raos prihatin saha kawigatosan kita sedaya. Karana wonten ing jaman ingkang sangsaya maju trap trapan tegnologi pembangunanipun  menika saget dadosaken kabudayan lan ungah ungguh jawa sangsaya dipun tilar dening para putra wayah. Mila kanthi mekaten dados salah satunggaling dhedhasar kagem Pemerintah Desa Kalitekuk kanthi ngawontenaken acara ingkang mendhet irah irahan Ngudi Kawruh Basa Jawa ingkang dipun pandegani dening Bapa Kepala Desa Kalitekuk nun injih Bapa waluya. Menggah nara sumber ingkang ngesuhi utawi paring piwucal babakan kawruh basa jawa menika nun injih panjnenganipun Bapa Susena Aji SPd, salah sawijining Tokoh kesenian jawi ingkang multi talenta,  Sutradara Kethoprak, Dhalang Wayang Kulit, campursari, lan sanes sanesipun. Ingkang sak menika ugi taksih ngasta Kepala Sekolah wonten ing salah sawijining Sekolah Dasar wonten ing Kecamatan Semin.

Adicara menika sakestu pikantuk tanggapan ingkang sae saking para rawuh ingkang sami ndherek pelatihan menika. Kepara ngersakaken adicara kados mekaten langkung dipun tingkataken wonten ing tahun tahun ingkang badhe datheng, supados langkung kathah ingkang pirsa utawi mangertosi tata basa ingkang leres saha sae. Sebab sak menika taksih kathah sanget ingkang ginakaken basa jawa miterat karebipun piyambak piyambak, kepara awakipun piyambak dipun unggulaken, sanadyan sejatosipun boten dipun jarak atur ingkang kados mekaten. Menawi menika dipun lajengkaen dados pakulinan ingkang boten sae, sebab wonten ing pamireng kejawi boten sekeca ugi ngasoraken tiyang sanes, lan werdinipun saget ngandhapaken jatidiripun ingkang paring pangandikan.

Ngudi Kawruh Basa Jawa punika saking panjenenganipun bapa Kepala Desa dipun dadosaken program utami pinangka panyengkuyungan Keistimewaan Jogjakarta ingkang badhe ngangkat budaya jawa supados boten kepedhotan ngantos dumugi putra wayah samangke. Dipun purwakani kanthi Pelatihan menika mugi dadosna dhedhasar anggenya sami ngginakaken basa jawa ingkang leres. Sedaya kedah dipun awiti saking ngandhap, mbok bilih sampun kagungan dhasar ingkang kiat lan leres boten badhe kangelan menawi badhe nglestantunaken kabudayan jawi kanthi Memayu hayuning pribadi; memayu hayuning kulawarga; memayu hayuning sesama; memayu hayuning bawana, amarga alam iki sejatining guru.

“WONG JAWA AJA ILANG JAWANE”